رواية أفندم .. أنا موجوود بقلم خالد إسماعيل..شرب محمد هندى ربع لتر برندى، وزجاجة بيرة، ودخن حوالى خمس سجائر، وردّ تحية أحد الأشخاص، واكتسى وجهه بغضب ثم قال موجهاً كلامه إلىّ:- - انت لسه رافض انك تتنظم فى حزب شيوعى !! أدهشنى السؤال ، وبعد صمت استغرق اقل من دقيقة قلت:
- وهوه فين الحزب بالشيوعى ده ؟!
- موجود .. انت كاتب وباحث سياسى وعارف ان التنظيم هو البداية الحقيقية للثورة.
- يعنى يا أستاذ هندى .. انت شايف ان الشيوعيين مسيطرين على الشارع وموجودين فى المزارع والمصانع وانا بس اللى مش ثورى !
- انت واخد المسألة هزار وتريقة ، والشيوعيين دول اللى انت مش شايفهم ضحوا كتير ، منهم اللى ضيع زهرة شبابه فى السجن ومنهم اللى ضحى بعمره واللى بيته انهار وخرب .. وانت بتتريق !
- تريقة ولا مش تريقة .. مش دى الحقيقة ؟ تقدر تقول لى ايه هو تأثير الشيوعيين فى مصر ؟ تقدر تقول لى عددهم كام ؟
- اه .. انت مباحث بقى واحنا منعرفش !
- كده انت بتغلط ياهندى .. عيب اللى بتقوله ده ، انا مش هدافع عن نفسى ولا انا محتاج ده ، المباحث هو اللى بيبوظ بنات الناس ويحولهم لـ (.....) باسم النضال والثورة .. المباحث هو اللى بيقبض مرتب وهو نايم والإسم ثورى محترف .. عيب لما يبقى فيكم ده كله وتشوهوا سمعة الناس ...
