كتاب لوحات نقدية من تأليف اشرف ماهر .. لوحات فنية نقدية
إضطرتنى ظروف عملى كمصرفى سواء فى قسم الخزينة او الصرف الأجنبى الى التعامل مع العملات النقدية والبنكنوت المحلية او الاجنبية . ولا أخفى عليكم إننى لطالما كرهت النقود ... فقد كنت موسوَساً من قذارتها ... فكنت اغسل يدى كل شوية لأن أصابعى كانت تصبح سوداء من قذارة البنكنوت وكنت اخشى ان ألمس وجهى او اى شئ لأنى أعلم كم الميكروبات التى تحملها أصابعى . وكنت متأكد من حجم الأمراض التى تنقلها تلك الأوراق .. ومع تقدمى فى العمر صدقت الذى كان يقوله لى والدى ان الفلوس فيها شيطان ، وشوفت بعينى انها سبب معظم الامراض الاجتماعية والنفسية .... تلك الاوراق لها مقدرة عجيبة على تخريب العلاقات وهى وراء معظم جرائم القتل او الانتحار والسرقة طبعاً ، وممكن تدفع الواحد لقتل او خسارة او خيانة او بيع أقرب الناس ليه حتى نفسه. وللأسف لقيت معظم الناس بتُقيّم مدى نجاح الأخرين او أنفسهم أحياناً بعدد الأوراق ( البنكنوت ) التى يمتلكونها . مع انى لاقيت ناس معهاش منها كتير راضين ومبسطوين وشبعانين ، وناس خزائنهم مليانه منها ومكتئبين وحزانى ومش شبعانين وفاشلين .......
المهم .... انا بقى علشان بحب أكون سعيد ومستمتع بأى عمل أو مكان أكون فيه ؛ قعدت أدور على اى حاجة حلوة وجميلة فى تلك الأوراق النقدية تخلينى انسى قذارتها وأقول ( الله ) ايه الجمال ده .... وعشان كمان انا باأحب الفنون بدأت أدور على الفن فى أوراق البنكنوت ، واكتشفت ان البنكنوت بيعبر عن ثقافة الشعوب بالرسومات اللى منقوشة على تلك العملات ... وفعلاً وجدت أوراق نقدية عبارة عن لوحات فنية تخليك تقول ( الله ) وتحب تتأمل فيها وتحتفظ بيها مش علشان تصرفها او قيمتها المادية ... لأ ... علشان هى جميلة فعلاً ... انا هنا اعرض بعض من هذه الأوراق النقدية ، يمكن تخليك تقول ( الله )
